Кездесу ашық диалог форматында өтті. Талқылауға аудандық прокуратураның прокуроры Нұртөре Сейітбек, салық басқармасы бөлімінің басшысы Сабира Әсетова және Кәсіпкерлер палатасы аудандық филиалының директоры Айдар Жамансарин қатысты.
2025 жылғы салықтық өзгерістер
Жиынның негізгі тақырыптарының бірі — Салық кодексіне 2025 жылдан бастап енгізілетін өзгерістер болды. Салық басқармасы бөлімінің басшысы Сабира Әсетова салық жүктемесін жүйелеуге бағытталған негізгі жаңалықтарды егжей-тегжейлі түсіндіріп берді.
«Кәсіпкерлердің өз бизнес-процестерін жаңа талаптарға алдын ала бейімдегені маңызды. Біздің мақсатымыз — жаңартылған заңнаманы білмеуден туындауы мүмкін қателіктердің алдын алу», — деп атап өтті спикер.
Құқық бұзушылықтың алдын алу
Сауда ережелерін сақтау мәселесіне де ерекше көңіл бөлінді. Аудан прокуроры Нұртөре Сейітбек ҚР «Әкімшілік құқық бұзушылық туралы» Кодексінің 200-бабы бойынша түсіндіру жұмыстарын жүргізді. Бұл ретте алкоголь өнімін сату талаптарының қатаң сақталуы сөз болды. Кәсіпкерлерге заң бұзушылық үшін жауапкершілік туралы ескертіліп, алдын алу шаралары мен заңдылық кез келген кәсіпорынның тұрақты жұмысының кепілі екені айтылды.
Мобильді топ — бизнестің қорғаны
Бизнесті заңсыз араласудан қорғау мәселесі кездесудің маңызды бөлігіне айналды. Палата филиалының директоры Айдар Жамансарин кәсіпкерлердің құқығын қорғау жөніндегі мобильді топтың жұмысы туралы баяндады.
Қазіргі таңда бұл топ бақылаушы-қадағалаушы органдар тарапынан жүргізілетін заңсыз тексерулердің жолын кесу мақсатында толыққанды жұмыс істеп тұр. Кәсіпкерлер қандай да бір заңсыз әрекеттер орын алған жағдайда жергілікті прокуратураға немесе Кәсіпкерлер палатасына дереу жүгіне алады.
